Гальшаны: Замак не даюць адбудаваць нават у мініяцюры

Автор: happynewbbln2rn
Рубрики: новости, история, регионы, учеба, туризм

Гальшанскі замак не даюць адбудаваць нават у мініяцюры. Менавіта гэта павінны былі зрабіць студэнты-архітэктары, што прыехалі да гаспадара аграсядзібы. Але мясцовыя ўлады гвалтам прымусілі іх пакінуць мястэчка.

Гальшаны па-ранейшаму застаюцца ў памежнай зоне, што ня можа спрыяць развіццю турызму. Пабудова зменшанай мадэлі славутага тамтэйшага замку магла б прывабіць цікаўных. Так думаў мясцовы жыхар Пётр Явідовіч, калі запрашаў на сваю сядзібу маладзёнаў-архітэктараў.

Але студэнты з Мінску і Брэста не паспелі нават і распачаць загадзя спланаваную будоўлю — улады іх тэрмінова выслалі. Гэта адбылося ў другой палове дня 19 ліпеня, выгнанцы толькі позна ўвечары дабраліся дахаты.

Пётр Явідовіч набыў у мястэчку дом, каб стварыць там музэй гадзіннікаў. Ягоная мара – пабудаваць аграсядзібу, каб туды прыяжджалі на адпачынак турысты. Дзеля гэтага яму заманулася стварыць у сябе Гальшанскі замак у зменшаным выглядзе, паколькі ад самога замку засталіся толькі руіны, якія працягваюць разбурацца.

Моладзь з асацыяцыі студэнтаў-архітэктараў спадар Явідовіч запрасіў на ўласны кошт. Прыехалі каля трыццаці чалавек. Моладзь паставіла намёты, спадар Явідовіч наладзіў ім харчаванне. Аднак тут з’явіліся памежнікі, санэпідэслужба ды іншыя.

Санэпідслужба ў асобе галоўурача Аляксандра Вайкуля і прадстаўнік МНС абвесцілі, што летніка тут быць ня можа – студэнты неадкладна павінны пакінуць Гальшаны!

Пятро Явідовіч гаворыць, што ў райвыканкаме яшчэ ў сакавіку распавядаў – улетку да яго прыедуць дапамагаць студэнты. Хай едуць, хай дапамагаюць, адказаў чыноўнік. Але цяпер вэртыкальнікі заяўляюць: арганізацыя летніка — гэта сур’ёзная справа, трэба было атрымаць загадзя згоду ўладаў, хаця б у сельсавеце.

// Алесь Кавалёў, BulletinOnLine